ភ្នំពេញ៖ បុណ្យចូលឆ្នាំចិន ឬហៅម្យ៉ាងទៀតថា បុណ្យនានិទាឃរដូវ គឺជាពិធីបុណ្យដ៏ធំសម្រាប់ពលរដ្ឋចិន និងពលរដ្ឋដែលកាត់សែស្រឡាយចិន ដែលតែងតែប្រារព្ធឡើងជារៀងរាល់ឆ្នាំ។ ចូលឆ្នាំចិនឆ្នាំនេះធ្វើឡើងចាប់ពីថ្ងៃទី២១-២៤ ខែមករា ឆ្នាំ២០២៣។
លោកគ្រូចិនសែ កុក ឡុង បានប្រាប់ឱ្យ EAC news ដឹងថាពិធីបុណ្យចូលឆ្នាំចិនមានប្រវត្តិទាក់ទងរឿងព្រេងរបស់ជនជាតិចិន ដោយបុរាណកាលមកមានសត្វចម្លែកមួយឈ្មោះនៀន សាហាវជាងសត្វខ្លារខិន បានមកអុកឡុកមនុស្សដោយចាប់មនុស្សធ្វើជាចំណី ហើយវាតែងតែចេញមកចាប់មនុស្សនៅពេលប្រជាកសិករច្រូតស្រូវហើយ។ ដូច្នេះហើយពលរដ្ឋចិនតែងតែច្រូតស្រូវហើយ រត់ចូលទៅក្នុងព្រៃដើម្បីគេចពីសត្វដ៏ចម្លែកនោះ។
បើតាមលោកគ្រូចិនសែ ក្រោយមកទៀត មានកូនក្មេង និងមនុស្សស្រីបាននាំគ្នាពាក់អាវពណ៌ក្រហម ហើយសត្វចម្លែកនោះក៏បានខ្លាចរបស់ដែលមានពណ៌ក្រហម។ បន្ទាប់មកពលរដ្ឋចិនបាននាំគ្នាគិតរិះរកមធ្យោបាយកម្ចាត់សត្វចម្លែកនោះ ដោយពលរដ្ឋខ្លះកាន់ភ្លើង និងពលរដ្ឋខ្លះបំផ្ទុះផាវ ទើបសត្វនៀននោះភ័យខ្លាច។
ចាប់ពីពេលនោះមក ពលរដ្ឋចិនបានចាត់ទុករបស់ពណ៌ក្រហម និងសំឡេងខ្លាំងៗពីផាវ គឺជាអាវុធដែលអាចបណ្តេញសត្វចម្លែកមួយនេះចេញផុតពីភូមិ ទើបបង្កើតឱ្យមានប្រពៃណីបុណ្យចូលឆ្នាំចិន ដុតផាវ លោតម៉ង់សាយ ព្យួរគោមក្រហម បិតក្រដាសក្រហម ជូនអាំងប៉ាវក្រហមជាដើម៕